"Bu mövzu ilə bağlı böyük narahatlıq içindəyik".

"Axar.az" türk mediasına istinadən xəbər verir ki, bu sözlər Fətullah Gülənlə bağlı ilginc fikirlər dərc edən, onun Azərbaycan məktəblərində Mərkəzi Kəşfiyyat İdarəsi agentlərinin olması haqda iddialar irəli sürən keçmiş FTB əməkdaşı Pol L. Vilyamsa xəbərdarlıq məktubunda yer alıb.

Sizə xəbərdarlıq edirik

Verilən xəbərdə bildirilir ki, Vilyamsın kitablarını nəşr edən nəşriyyata bir "mesaj" göndərilib. "Prometheus Books"a özünü müstəqil redaktor olaraq təqdim edən B.D. adlı şəxs mesajında bunları yazıb:

"Dəyərli dostlar. Mən Türkiyənin müstəqil redaktorlarından biriyəm. Türkiyənin qəzetlərinin birində sizin yazarlarınızdan olan Pol Vilyams haqqında bir xəbər çıxıb. Əslində 2013-cü ilin 17 dekabr tarixindən indiyə kimi davamlı olaraq yalan xəbərlər verilir. Lakin bu xəbərdə Vilyams Pensilvaniyada yaşayan dini lider Fətullah Gülənin "terrorçu, şantaj edən" olduğunu deyir və xəbərdarlıq edir. Bu mövzu haqqında böyük narahatlıq içindəyik. Lütfən cənab Vilyamsın mənimlə, ya da Türkiyədəki hər hansı bir televiziya, ya da qəzetlə əlaqə saxlamasını təmin edin. Bu mövzunun təcili olması haqqında sizə xəbərdarlıq edirik".

Xatırladaq ki, iki gün öncə saytımızda FTB-nin keçmiş müşaviri Pol L. Vilyamsın müsahibəsi əsasında hazırlanan "FTB: "Gülənin Azərbaycan məktəblərində MKİ agentləri işləyir"" başlıqlı materialı təqdim etmişdik.