İstanbulda Gəzi olayları zamanı Taksimdə konsert verən pianoçu Devid Martello bu dəfə separatçıların hakim olduğu Donetskdə konsert verib.

"Axar.az" xəbər verir ki, Martello avtomobil vasitəsilə pianosunu Almaniyadan Ukraynaya gətirib.

İtalyan əslli alman pianoçu "öz əllərimlə yaratdım", - dediyi piyanosunu Donetskdə qubernatorluq binasının qarşısında qoyub.

Qubernatorluq binası qarşısında piano çalan Martello ətrafdakıların təəccübünə səbəb olub.

"Yalnız sülh üçün bura gəldim", - deyən Martello nə Rusiya, nə də Ukrayna tərəfdarı olduğunu, gərginliyin aradan qalxmasına yardımçı olmaq məqsədi ilə gəldiyini deyib.

Qeyd edək ki, Martello bundan öncə Türkiyədə aksiyalar zamanı piano çalmışdı.