Tailandda hərbçinin dinc insanlara atəş açmasının motivi məişət konflikti ilə bağlı olub.

Axar.az xəbər verir ki, bunu Tailand baş naziri, general Prayut Çan Oça jurnalistlərə açıqlamasında deyib.

“Motiv cinayətkar və onun xidmət yoldaşları arasında ev satışı ucbatından yaranan məişət konflikti olub. Quru Qoşunları Komandanlığı bu konfliktin detallarını öyrənməyə çalışacaq ki, faciənin baş vermə səbəbini anlasın”, – deyə o bildirib.

Qeyd edək ki, dünən Tailandın şimal-şərqindəki ticarət mərkəzlərindən birində 32 yaşlı xüsusi təyinatlı, Quru Qoşunlarının kapralı Çakrafant Txomma dinc sakinləri girov götürüb. Xüsusi təyinatlılar ərazini mühasirəyə alsa da, dinc sakinlərə atış açan hərbçi 1 xüsusi təyinatlını öldürərək, mühasirədən qaçmağı bacarıb.

Onu səhər saatlarında zərərsizləşdirmək mümkün olub.

Son məlumata görə, hadisə nəticəsində ümumilikdə 27 nəfər ölüb, 63 nəfər yaralanıb. Yaralılardan 57-si xəstəxanaya yerləşdirilmişdi ki, onlardan da artıq 25-i evə buraxılıb.