Ermənistanda baş verən referendumla bağlı beynəlxalq təşkilatlar öz qiymətləndirmələrini verməyə başlayıblar.

Axar.az xəbər verir ki, bu məlumatı “Past” qəzeti yayıb. Məlumata görə, referendumla bağlı narahatlığını AŞPA-nın Monitorinq Komitəsinin Ermənistan üzrə məruzəçiləri Andrey Şirçel və Kimmo Kilyunen dilə gətiriblər. Məruzəçilər narahatlıqlarının xüsusilə Ermənistanın Baş nazir administrasiyası və Konstitusiya Məhkəməsi arasındakı gərginliklə bağlı olduğunu vurğulayıblar.

Yaxın zamanlarda məruzəçilərin Ermənistandakı hadisələrin inkişafı ilə bağlı sərt bəyanat yayacağı bildirilib.

“Konstitusiya Məhkəməsi ətrafındakı problemlərlə əlaqədar referenduma qədər Avropa nümayəndə heyətinin Ermənistana səfər edəcəyi və situasiyanı dərindən tədqiq edəcəyi gözlənilir”, - məlumatda bildirilib.