İrəvan məhkəməsi Çiçəklənən Ermənistan Partiyasının lideri Qagik Çarukyanın həbs edilməsi ilə bağlı qərar verib.

Axar.az xəbər verir ki, bu barədə jurnalistlərə onun vəkili Erem Sərkisyan məlumat verib.

"Gözlədiyimiz kimi, məhkəmə Qagik Çarukyana qarşı həbs qətimkan tədbiri seçilməsinə qərar verdi", - o deyib.

Sərkisyan apellyasiya şikayəti verəcəklərini bildirib.

Çarukyanın özü isə məhkəmə iclasında iştirak etməyib və qərarı qanunsuz adlandırıb:

“Bu, əsl qanunsuz qərardır. Bunun arxasında dayananlar qanun qarşısında cavab verəcəklər”.

Qeyd edək ki, bundan öncə Ermənistan Baş prokuroru parlament qarşısında Çarukyanın məsuliyyətə cəlbi üçün toxunulmazlığının ləğvi ilə bağlı müraciət etmişdi. Parlament buna razılıq vermişdi.

Çarukyan seçicilərin satın alınmasında ittiham edilir. Çarukyan bu ittihamları rədd edir.