Məşhur fizika professoru Stiven Hokinq qarşıdakı min il içində dünyanı tərk etməsək, insanlığın yox olacağını iddia edib.

Axar.az xəbər verir ki, müasir dövrün ən məşhur və ən nüfuzlu fizik-nəzəriyyəçilərindən biri olan Hokinq bu iddiaları Avstraliyanın Sidney şəhərindəki Opera evində holoqram görüntüsü ilə iştirak edərkən səsləndirib.

Alim çıxışında belə iddialar səsləndirib: "İnsanlığın gələcəyi üçün kosmosu kəşf etməyə davam etməliyik. Başqa planetlərə getmədən üzərində yaşadığımız bu kövrək planetdə bir min il daha var ola biləcəyimizi zənn etmirəm".

73 yaşlı Hokinqin Amerikadakı evində çəkilən çıxışı San Josedə işlənərək Sidney Opera evinə ötürülüb. Tədbiri Hokinqin yazar qızı Lusi Hokinq aparıb.

Hokinq "Zaynın "One Direction" musiqi qrupundan ayrılması haqqında nə düşünürsünüz?" sualına isə "Nəhayət kimsə bizim üçün həqiqətən çox əhəmiyyətli olan bir sual soruşdu", cavabını verib.