Ukraynalı deputat Aleksey Qonçarenko bildirib ki, Rada Prezident Vladimir Zelenskinin səlahiyyətlərinin uzadılmasına dair qətnamə qəbul etmək üçün yeni cəhd edəcək.

Axar.az Bakupost.az-a istinadən xəbər verir ki, siyasətçi bu barədə öz Teleqram kanalında yazıb.

Onun sözlərinə görə, müvafiq sənədin növbəti iclasda səsverməyə çıxarılması planlaşdırılır:

"Demokratiyaya dəstək haqqında qətnamə yenidən Radaya təqdim olunur, növbəti iclasda baxılacaq".

Fevralın 24-də deputat Yaroslav Jeleznyak bildirib ki, Ali Radada Vladimir Zelenskinin səlahiyyətlərinin davam etdirilməsinin dəstəklənməsi ilə bağlı qətnamə səsvermədən keçməyib. Qətnamənin lehinə 218 deputat səs verib. Onun keçməsi üçün 226 səs tələb olunurdu.

Bundan sonra Radanın keçmiş deputatı, “Başqa Ukrayna” hərəkatının eksperti Spiridon Kilinkarov bəyan edib ki, Zelenskinin səlahiyyətlərinin uzadılmasına dair səsvermə onun parlamentin dəstəyini itirdiyini və tezliklə hakimiyyəti də itirəcəyini göstərir.

Zelenskinin rəsmi səlahiyyət müddəti 2024-cü il mayın 20-də başa çatıb.