“Parni iz Baku” KVN komandasının unudulmaz və sevimli obrazı Ağanatiqin növbəti “Ağanatiq 2” komediya filmi təqdimat mərasiminə hazırlaşır.

Kult.az xəbər verir ki, KVN komandasının təqdimat mərasimini fevral ayının 23-nə təyin etməsi isə birmənalı qarşılanmayıb. Sovet donanmasının yaranma günündə (SSRİ zamanı Ordu Günü kimi qeyd edilib) Heydər Əliyev Sarayda “Ağanatiq 2” komediya filminin təqdimat mərasiminin keçirilməsi qınanılır.

Azərbaycanı işğal edən bir ordunun yaranma gününün hələ də kimlərsə tərəfindən yaşadılması vaxtaşırı müzakirə edildiyi üçün bu təqdimat mərasiminin 23 fevrala salınması diqqət çəkməyə bilməz.

Komandanın bunu qəsdən, yoxsa bilməyərəkdən etməsi də sual yaradır. Təqdimat mərasimi üçün niyə məhz bu tarix seçilib?

Məsələ ilə bağlı filmin baş rol ifaçısı və ssenari müəlliflərindən olan Cabir İmanovla əlaqə saxladıq. Lakin o, suala cavab vermək istəmədi.

Ssenari müəllifi Tahir İmanov isə Kult.az-a açıqlamasında bu məsələnin onu maraqlandırmadığını bildirdi. Əlavə etdi ki, o, bununla Azərbaycan Respublikasının hansısa qanununu pozmayıb.

Xatırladaq ki, “Ağanatiq 2” komediya filmində rolları Cabir İmanov, Bəhram Bağırzadə, Azər Məmmədzadə və Tahir İmanov canlandırıb.