Rusiya üçün Cənubi Qafqazda sülhün olması çox vacibdir. İlham Əliyevin müdrikliyi və Vladimir Putinlə münasibətləri sayəsində indi bu sülh bərpa olunub.

Axar.az xəbər verir ki, bunu Rusiyanın Azərbaycandakı səfiri Mixail Yevdokimov Baku TV-yə müsahibəsində deyib.

Onun sözlərinə görə, Moskva Azərbaycan və Ermənistan arasında sülh müqaviləsinin mətni üzrə əldə edilmiş razılaşmanı alqışlayır və ölkələr arasında normallaşma prosesinin davam etdirilməsində maraqlıdır:

“Rusiya Azərbaycan və Ermənistan arasında nəqliyyat marşrutlarının inkişafı, sərhədin delimitasiyasının davam etdirilməsi üçün bütün lazımi səyləri göstərməyə hazırdır. Ötən il Azərbaycan və Rusiya prezidentlərinin dörd dəfə görüşməsi, Putinin Azərbaycana dövlət səfəri, iki ölkənin baş nazirinin üç dəfə görüşü, baş nazirin müavinləri Şahin Mustafayev və Aleksey Overçuk səviyyəsində daimi təmasların saxlanması Bakı ilə Moskva arasında əlaqələrin fəal şəkildə inkişafıdır. Rusiya və Azərbaycanın müttəfiqlik münasibətlərinin inkişafı üçün böyük potensialı var”.