Azərbaycan Dövlət Gənc Tamaşaçılar Teatrının kollektivi Türkiyənin Konya şəhərində keçiriləcək 9-cu "Min nəfəs, bir səs" Beynəlxalq Teatr Festivalına dəvət alıb.

Teatrın mətbuat xidmətindən Axar.az-a verilən məlumata görə, bu il aprelin 20-dən 30-na qədər davam edəcək festival Konya Dövlət Teatrının təşkilatçılığı ilə həyata keçirilir.

Hər il festivala Türkiyədən və dünyanın müxtəlif ölkələrindən türk dilli teatr kollektivləri qatılırlar. Dövlət Gənc Tamaşaçılar Teatrının kollektivi iştirak üçün festivalın münsiflər heyətinə cari repertuarında olan iki tamaşa (Ə.Haqverdiyev "Xortdanın cəhənnəm məktubları" və L.Nuren "Mən gəldim, qızlar" ("Müharibə")) haqqında məlumat göndərib. Münsiflər heyəti tərəfindən qəbul olunacaq tamaşa festivalda nümayiş etdiriləcək.

Qeyd edək ki, festivalın keçirilməsinin əsas məqsədi müasir türk teatrına yeni səhnə əsərləri, eləcə də gənc və fərqli baxışa malik insanlar qazandırmaqdır.