Rusiya Azərbaycan diasporunun tanınmış siması, İvanovo vilayətindəki Azərbaycan Milli-Mədəni Muxtariyyətinin rəhbəri Asif Məmmədov deputatlığa namizədliyini geri götürməyə vadar edilib.

Axar.az Musavat.com-a istinadən xəbər verir ki, Məmmədova qarşı müxtəlif şantaj vasitələri işə salınıb və əsas “günahı” da açıq elan olunub: Azərbaycan Prezidenti İlham Əliyevə sevgi və dəstəyini ifadə etmək. Hətta onun 2023-cü ilin dekabrında Prezident İlham Əliyevə ünvanladığı təbrik məktubu belə, Rusiyada “kompromat” kimi təqdim edilərək mediada tirajlanıb.

Rus mediasında yayılan yazılarda açıq şəkildə “azərbaycanlı mafiyasının” parlamentə buraxılmaması təbliğ olunur, diaspor nümayəndələri hədəfə alınır. Kremlə yaxın dairələr isə bu prosesdə hətta “xüsusi minnətdarlıqla” Mərkəzi Seçki Komissiyasına (Pamfilovanın komandasına) təşəkkür edir.

Əslində isə bu, Rusiyanın Azərbaycan diasporuna qarşı sistemli təzyiq və repressiyasının daha bir nümunəsidir. Çünki hədəf seçilənlər arasında məhz Azərbaycanı sevdiyini bildirən, özünü həmvətənlərinin təmsilçisi hesab edən şəxslərdir.

Asif Məmmədovun deputatlığa namizədliyinin qarşısının alınması göstərir ki, Rusiya üçün artıq təkcə siyasi mövqe deyil, həm də Azərbaycan sevgisi belə “cinayət dosyesi”nə çevrilib.

Bu hadisə Kremlin Azərbaycan diasporuna qarşı “soyuq müharibəsi"nin davam etdiyini bir daha ortaya qoyur.