Xəbər verdiyimiz kimi, Səfərbərlik və Hərbi Xidmətə Çağırış üzrə Dövlət Xidmətinin sabiq rəis müavini, general-mayor Novruzəli Orucovun oğlu Rüstəm Orucovun keçmiş sevgilisini təhdid etdiyi iddia olunurdu.

Axar.az xəbər verir ki, polisə sosial şəbəkə vasitəsilə müraciət edən Nərmin Xudaverdiyeva bu gün məsələnin yekunlaşdığını açıqlayıb.

O bildirib ki, ötən gün sözügedən məsələ ilə bağlı Nərimanov Rayon Polis İdarəsinə dəvət alıb:

“Mənə bildirdilər ki, Rüstəm Orucov Tiktok platformasında etdiyi əməlləri inkar etsə də, polis idarəsində boynuna alıb. Etdiyim şikayətləri qəbul edib və peşmançılığını yazılı formada bildirib”.

N.Xudaverdiyeva həmçinin əlavə edib ki, Rüstəm Orucov ondan və anasından üzr istəyib.

Qeyd edib ki, yaranmış vəziyyətin həllini nəzərə alaraq polisə etdiyi şikayəti geri götürüb.