Millət vəkili Qənirə Paşayeva Türkiyənin Kırşəhər vilayətində “30-cu Əxilik Həftəsi”nin açılış mərasimində iştirak edib.

Axar.az xəbər verir ki, Gənclik və İdman naziri Osman Aşkının da iştirak etdiyi mərasimdə çıxış edən millət vəkili Qənirə Paşayeva Azərbaycan və Türkiyənin qardaşlığından bəhs edərək qədim Əxilik təşkilatının təməl fəlsəfəsinin qardaşlıq olduğunu söyləyib. Əxilik təşkilatının qurucusu Əxi Evrənin azərbaycanlı olduğunu, Xoy şəhərindən Anadoluya gəldiyini qeyd edən Qənirə Paşayeva təşkilatın qədim qayda-qanunlarından söz açıb.

Millət vəkili türklərin böyük bir imtahandan keçdiyi Çanaqqalada yüzlərlə azərbaycanlı, 1918-ci ildə Nuru Paşanın komandanlığı altında Azərbaycana gələn Qafqaz İslam Ordusunun yüzlərlə türk əsgərinin şəhid olduğunu, bunların da bir neçəsinin kırşəhərli şəhidlər olduğunu xatırladıb.

Əxilik yürüşündən və konfransdan çox təsirləndiyini dilə gətirən millət vəkili Qarabağ problemindən danışaraq, gələn il Əxilik yürüşünün Qarabağda, Şuşada, azad edəcəyimiz bütün o gözəl torpaqlarımızda da təşkil etmək arzusu ilə çıxışını bitirib.