"Yeniyetmələrin şəxsiyyət kimi formalaşmasında ailə ilə yanaşı, cəmiyyətin də rolu böyükdür".

Bu sözləri Axar.az-a açıqlamasında psixoloq Vəfa Əkbər yeniyetmələrin şəxsiyyət kimi formalaşmasına təsir edən faktorlardan danışarkən deyib. Psixoloqun sözlərinə görə, yeniyetməlik dövrü elə həssas dövrdür ki, bu dövrdə şəxsdə fizioloji, bioloji və psixoloji dəyişikliklər baş verir:

"Yeniyetməlik dönəmində bu üç prosesin bir arada getməsi şəxsdə müəyyən dəyişikliklərə səbəb olur. Bu dəyişikliklər özünü davranışda daha çox göstərir. Bu dönəmdə insan beyinində formalaşma baxımından ciddi dəyişikliklər getdiyindən, onlar çox həssas olurlar. Yəni yeniyetmə bir gənc elə bir dönəmdən keçir ki, o, pis yönləndirildikdə mənfi istiqamətə, yaxşı yönləndirildikdə isə müsbət istiqamətə doğru gedir. Sadəcə olaraq, bu dönəmdə onlarla daha ehtiyatlı davranmağı məqsədəuyğun hesab edirəm.

Belə dönəmdə ailənin rolu daha böyükdür. Əgər uşaq ailədə valideynlərlə normal münasibət və ünsiyyətdə olarsa, demək, onun ətrafı da normal olacaq. Əks təqdirdə ailədən pis münasibət və yalnız basqı görərsə, bu, yeniyetmənin sosial həyatına da mənfi təsir göstərəcək. Ailə ilə yanaşı, yeniyetmənin şəxsiyyət kimi formalaşmasında cəmiyyətin də rolu böyükdür. Hər iki halda yeniyetmənin formalaşmasında birinci növbədə ailə böyük rol oynayır. Bu baxımdan da belə bir həssas dönəmdə valideynlərin üzərinə böyük məsuliyyət düşür".