Xəbər verdiyimiz kimi, Yeni Saray yaşayış massivi Ziya Bünyadov küçəsində ümumi istifadədə olan ana yolda qanunsuz tikinti aparılırdı.

Axar.az xəbər verir ki, bu haqda məlumat yayıldıqdan sonra fevralın 8-də Saray bələdiyyəsi tikilinin sökülməsinə başlandığını bildirmiş və faktı təsdiqləyən foto yaymışdı.

Bələdiyyə sədri Məhi Həsənov saytımıza bildirmişdi ki, sözügedən tikili sökülür, qanunsuzluq aradan qaldırılır.

Lakin üzərindən 3 gün keçməmiş Ziya Bünyadov küçəsidə sökülən qanunsuz tikili yenidən bərpa olunub.

Məsələ ilə bağlı Abşeron rayon İcra Hakimiyyətinin yerli nümayəndəliyindən saytımıza bildirilib ki, qanunən vətəndaşa xəbərdarlıq edilib. Söküntü işləri nümayəndəliyin səlahiyyətlərinə aid deyil:

“Bunun üçün texnika və işçi qüvvəmiz yoxdur. Bu məsələyə FHN baxır. Öhdəmizə düşən işə nəzarət edəcəyik”.

FHN-dən saytımıza verilən açıqlamada isə qeyd olunub ki, məsələnin araşdırılması üçün müvafiq quruma müraciət edilib. Nəticəsi barədə məlumat veriləcək.