Dedi ki, səndən pullu, yaraşıqlı birinə gedəcəm.

Axar.az xəbər verir ki, bunu quldurluğa görə həbs edilən Şəki sakini Seymur Əsgərova arvadı Həqiqət Əsgərova deyib.

S.Əsgərov fevralın 18-də polisə zəng edərək rayonun Qarabulaq kəndindəki yarımtikilidə iki naməlum şəxs tərəfindən əl-ayağının bağlandığını bildirib. Bildirib ki, həmin şəxslər onun 143 manatını və mobil telefonunu götürüblər.

Seymur əl-qolu bağlı vəziyyətdə tapılıb. O, bu cinayətdə arvadından və onunla qeyri-rəsmi nikahda yaşayan Əvəz Həsənovdan şübhələndiyini söyləyib. Elə fevralın 18-də hər iki şəxs şübhəli şəxs qismində saxlanılıb.

Sonra məlum olub ki, Seymur onu tərk edən arvadından qisas almaq, xəyanət etdiyi üçün Həqiqətin cinayətkar olduğunu sübut etmək məqsədi ilə bu işi səhnələşdirib.

Ona əl-qolunu bağlamaqda dostu, Bakı sakini Səbuhi Zalov kömək edib. Bu əməliyyatın ifşasından sonra Seymur barəsində quldurluq maddəsilə cinayət işinə başlanıb.

S.Əsgərov "Region TV"yə deyib ki, pulu olmadığı üçün yoldaşı üzünə qayıdıb:

"Dedi, səndən yaraşıqlı, pullu, şəxsiyyətli bir oğlana gedəcəm. Baxdım ki, kasıbçılıq məni beləmi sındırır? Gedəndən 3 gün sonra profilə bir şəkil qoydu, o şəkil də mənə çox ağır gəldi".

Araşdırmalar zamanı müəyyən edilib ki, arvadı Seymura müxtəlif şəxslərlə xəyanət edib. S.Zalov isə əməlindən peşmanlığını və dostu Seymurun planından xəbərsiz olduğunu bildirib.