Moskvada Areq Şepixin (Ohannisyan) oğurlanmayıb, Moskvanın müvafiq idarələri ilə əməkdaşlıq edən çeçen hüquq-mühafizə orqanlarının əməkdaşları tərəfindən həbs edilib.

Axar.az xəbər verir ki, bu sözləri Çeçenistanın milli siyasət naziri Əhməd Dudayev deyib.

O əlavə edib ki, Şepixinin dindarların dini hisslərini təhqir etmək məqsədi ilə həyata keçirdiyi ictimai hərəkətləri ilə bağlı araşdırma aparılır.

Dudayevin sözlərinə görə, həmin şəxs dəfələrlə etnik təmizləməyə və nasizmə açıq çağırış edib, dini və Allahı təhqir edib, həmçinin ekstremist fikirlər səsləndirib və azyaşlı uşaqları zorlamaq niyyətində olduğunu bəyan edib:

“Həbs olunan şəxsin əməllərinə haqq qazandırmaq həm də ölkəmizin Cinayət Məcəlləsinin bir neçə maddəsinə ziddir, hazırda bununla bəzi blogerlər və sarı mətbuatın nümayəndələri məşğul olur. Korrupsioner Teleqram kanalları xüsusilə qabarıqlaşıb, sifarişli məqalələr dərc edir, müəllifləri adıçəkilən cinayətkarı "qurban” kimi qələmə verməyə çalışır”.

Qeyd edək ki, ötən gecə Moskvanın mərkəzindəki Yaroslavski dəmir yolu vağzalında bir qrup şəxs çeçen, dağıstanlı və müsəlmanları təhqir edən 40 yaşlı erməni Areq Samveloviç Şepixini “Mersedes”in baqajına basaraq, aparmışdı. Şepixin Azərbaycana qarşı fəallığı ilə də seçilib.