"Dağlıq Qarabağ və Azərbaycanın işğal olunmuş digər ərazilərində zorakılıq hallarının artması" adlı məruzənin qəbul olunmamasını iki səbəblə əlaqələndirirəm.

Axar.az xəbər verir ki, bu haqda politoloq Elxan Şahinoğlu açıqlama verib. Siyasi şərhçi hesab edir ki, sözügedən qətnamənin qəbul olunmamasının birinci səbəbi ATƏT Minsk Qrupu həmsədrlərinin AŞPA-ya təzyiqidir:

"Həmsədrlər bir neçə gün öncə birgə bəyanat yayaraq faktiki bildirdilər ki, AŞPA bizim işimizə qarışmasın, Dağlıq Qarabağ problemi ilə biz məşğuluq. Bu açıqlama ermənilərin əlini gücləndirdi. İkincisi, görünür Ermənistanın xarici işlər naziri AŞPA-da qətnamələrin qəbul olunmaması üçün əlindən gələni edib. Üstəlik, Avropadakı erməni lobbisinin təzyiqlərinin artmasının da burada rolu var. "Dağlıq Qarabağ və Azərbaycanın işğal olunmuş digər ərazilərində zorakılıq hallarının artması" adlı məruzənin qəbulu "Azərbaycanın sərhədyanı rayonlarının sakinlərinin qəsdlə içməli sudan məhrum edilməsi" məruzəsindən daha vacib idi. Təəssüf, birinci məruzənin qəbuluna cəmi 4 səsimiz çatmadı".

Qeyd edək ki, Avropa Şurası Parlament Assambleyasının (AŞPA) qış sessiyası çərçivəsində bu gün "Azərbaycanın qəsdən sudan məhrum edilmiş sərhəd rayonlarının sakinləri" qətnaməsi 98 lehinə, 71 deputat əleyhinə olmaqla qəbul edilib (40 deputat bitərəf qalıb), Robert Uolterin (Böyük Britaniya) "Dağlıq Qarabağ və Azərbaycanın digər işğal olunmuş ərazilərində zorakılığın artması" qətnaməsi isə 70 əleyhinə, 66 lehinə olmaqla (45 nəfər bitərəf) qəbul edilməyib.