11:09

Əməkdar artist Telman Əliyev vəfat edib.

Bu barədə APA-ya açıqlamasında Telman Əliyevin tələbəsi Eleanora Mehdiyeva məlumat verib.

Onun sözlərinə görə, T. Əliyev bu gün ürək çatışmazlığından dünyasını dəyişib.

Qeyd edək ki, Telman Əliyev 1 noyabr 1947-ci ildə Gəncə şəhərində anadan olub. 1982-ci ildə Azərbaycan Dövlət İncəsənət İnstitutunun Mədəni-maarif fakültəsini bitirib. Gəncə Dövlət Dram Teatrının səhnəsində və Akademik Milli Dram Teatrının səhnəsində müxtəlif rollarda çıxış edib.

“Bir aktyorun teatrı” (Araq düşkünü), "Bahar-99" (Məşədi) teletamaşalarında, "Şeytan içimizdədir" (şöbə rəisi), "Yük" (Duxançı), "Bizi dağlarda axtarın" filmlərində çəkilib.

***

Əməkdar artist, mərhum aktyor Telman Əliyev sabah dəfn olunacaq.

Bu barədə Aznyus.az-a mərhumun ailəsindən məlumat verilib. Aktyorla vida mərasimi Biləcəridə, yaşadığı evində keçiriləcək.

Aktyor Xırdalan qəbiristanlığında dəfn olunacaq.

Əməkdar artist, Akademik Milli Dram Teatrının aktyoru Telman Əliyev səhər saatlarında qəflətən dünyasını dəyişib. Həkimlər mərhumun ölümünü ürək çatışmazlığı ilə əlaqələndirib.