Dekabrın 1-dən gündə 900 mühacir Kanadanın Toronto və Monreal aeroportuna gəlməyə başlayacaq.

Axar.az xəbər verir ki, BMT-yə aid təşkilatlar, Kanada Sərhəd Təhlükəsizliyi Agentliyi və Kanada Gizli Xidməti vasitəsi ilə şəxsi məlumatları alınan mühacirlərdən hər həftə 6300-ü Kanadaya gətiriləcək.

Beləcə, Kanada Baş naziri Castin Tryudonun seçki kampaniyası vaxtı verdiyi sözə əməl olunaraq yeni ilə qədər 25000 suriyalı mühacirin Kanadaya qəbulu hədəflənir. Kanada hökumətinin "Suriyalı mühacir əməliyyatı" adını verdiyi transferi Livan, İordaniya və Türkiyədən həyata keçiriləcək.

Kanadaya hərbi və sərnişin təyyarələri ilə daşınacaq mühacirlər birinci mərhələdə hərbi bazalara yerləşdiriləcəklər. Burada səhiyyə idarəsi tərəfindən yoxlanılandan sonra onlara yaşayış hüququ veriləcək. Hökumət işçiləri əməliyyatların sürətlə başa çatması üçün rəsmi tətil günləri, həftəsonları və iş saatlarından sonra da işləyəcəklər.

Federal hökumət 25000 suriyalı mühacir üçün qarşıdakı 6 il boyu 1.2 milyard dollar xərcləyəcəyini açıqlayıb.