Əgər 15 iyul hərbi çevrilişi uğurlu olsaydı, ölkədə böyük vətəndaş müharibəsi yaradılacaqdı.

Axar.az xəbər verir ki, bu sözlər türkiyəli yazar İbrahim Qaragülün "Yeni Şəfəq" qəzetindəki köşəsində yer alıb. Onun sözlərinə görə, bu hərbi çevriliş sayəsində ölkədə ələvi-sünni, türk-kürd savaşı başlayacaqdı:

"Hədəf təkcə dövlət idarəçiliyinə nəzarət etməkdən ibarət deyildi. Türkiyə daxilində vətəndaş müharibəsi ssenarisi hazırlanırdı. Yaşadığımız coğrafiyadakı bütün savaşlar Türkiyədə başladılacaqdı. Bir kəşfiyyat qurumu tərəfindən idarə edilən Gülən və terrorçuları ölkəni təslim edəcəkdilər, əvəzində isə onlara öz "Vatikan"ı veriləcəkdi. Bütün bunlar uğursuzluğa düçar oldu, amma təhlükə hələ də davam edir. İndi bəzi yerlərdə ələvi-sünni qarşıdurması provokasiya edilir.

Ümumiyyətlə, burada məqsəd Türkiyənin regional güc xəritəsindən birdəfəlik silinməsidir. Bizə "ya təslim ol, ya da daxili savaşa razı ol" dedilər. Türkiyə-Rusiya böhranı da məhz bu qrupun layihəsi idi. Bizi təkləmək, Qərbin qucağına atmaq, seçim imkanlarımızı yox etmək planlaşdırılmışdı. Bu, həm də yeni Krım savaşı təcrübəsi idi".