İtaliyanın “Eurasian Business Dispatch” analitik portalı tədqiqatçı Domeniko Letisiyanın müəllifi olduğu “Ermənistan və Azərbaycan arasında sülh danışıqları: ümid və ya məyusluq” adlı məqalə yayıb.

Axar.az xəbər verir ki, məqalədə Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində Azərbaycan və Ermənistan prezidentlərinin Cenevrədə keçirdikləri son görüş haqqında məlumat verilir, hər iki ölkənin xarici işlər nazirləri və ATƏT-in Minsk qrupunun həmsədrlərinin görüşün nəticələri ilə bağlı bəyanatı diqqətə çatdırılır.

Müəllif Cenevrə görüşünün cari ilin iyul ayında işğal olunmuş Füzuli rayonunun Alxanlı kəndində Ermənistan silahlı qüvvələrinin hücumu nəticəsində iki azərbaycanlı mülki vətəndaşın öldürülməsi ilə nəticələnmiş son gərginlikdən sonra prezidentlər arasında keçirilmiş ilk görüş olduğunu xatırladır. Məqalədə görüşün nəticələrindən doğan müsbət əhvali-ruhiyyəni prezident Serj Sərkisyanın Ermənistanın İsveçrədəki səfirliyində erməni diasporunun nümayəndələri ilə keçirdiyi görüşdə Qarabağın Azərbaycan sərhədlərindən kənarda mövcudluğunun münaqişənin yeganə həll yolu olduğunu deməsi ilə korladığı vurğulanır. Müəllif bu bəyanatla bağlı Azərbaycan Prezidentinin xarici siyasət məsələləri üzrə köməkçisi Novruz Məmmədovun fikirlərinə yer verərək, S.Sərkisyanın yenə də sözünü tutmadığını və danışıqlar zamanı əldə olunmuş razılığı pozduğunu bildirir. Məqalədə Novruz Məmmədovun aşağıdakı fikrinə yer verilir: “Sərkisyan bilir və unutmamalıdır ki, Dağlıq Qarabağ Azərbaycanın ayrılmaz hissəsidir və belə də qalacaq. Sərkisyanın planı nə onun vaxtında, nə də ondan sonra gələnlərin vaxtında reallaşmayacaq. Nə qədər himayədarlarına quyruq bulasa da, yuxusu çin olmayacaq”.

Yazıda Ermənistanın Azərbaycana qarşı təcavüzü, Dağlıq Qarabağ münaqişəsinin başlanması, Azərbaycanın beynəlxalq səviyyədə tanınmış ərazisinin 20 faizinin işğalı, Ermənistanın işğal olunmuş ərazilərdə həyata keçirdiyi etnik təmizləmə siyasəti və Xocalı soyqırımı barədə məlumat verilir. Bundan əlavə, Ermənistanın öz hərbi–siyasi təcavüz aktını əsaslandırmaq məqsədilə Azərbaycanın işğal olunmuş ərazilərində özü də daxil olmaqla heç bir dövlət tərəfindən tanınmayan qanunsuz oyuncaq rejim yaratdığı qeyd olunur.

Məqalədə, həmçinin BMT Təhlükəsizlik Şurasının Azərbaycanın ərazi bütövlüyü və suverenliyini təsdiq edən və Ermənistan silahlı qüvvələrinin işğal olunmuş ərazilərdən təcili, tam və qeyd-şərtsiz çıxarılmasını tələb edən dörd qətnaməsinə Ermənistan tərəfindən məhəl qoyulmadığı diqqətə çatdırılır.

Məqalənin mətni ilə BURDAN tanış olmaq mümkündür.