Qazaxıstanda arxeoloji qazıntıları araşdıran Beynəlxalq Türk Akademiyasının rəhbəri professor Darhan Xıdıreli açıqlama verərək arxeoloji qazıntılarda Ərgənəkon dastanında bəhs edilən yerlərlə üst-üstə düşən tapıntılar ortaya çıxdığını bildirib.

Axar.az xəbər verir ki, Qazaxıstanın Qaraqaba vadisində Türk və Altay mədəniyyətində müqəddəs məzar, türbə mənasını verən kurqanların olduğu, qazıntıların aparıldığı ərazidən çıxarılan tapıntılar "Qızıl Beşik Altay" Beynəlxalq Seminarında açıqlanıb.

Tapılan qopuq, qılınc, qalxan kimi yaraq-əsləhə ilə bərabər, bəzi məzarların Göytürklər dövrünə aid əhəmiyyətli məlumatları ortaya çıxardığını bildirən alim qazıntılarda tapıntıların bölgənin çətin vaxtlarda türklərin sığındığı "Ərgənəkon" bölgəsi ola biləcəyi ehtimalını gücləndirdiyini qeyd edib:

"Qazıntılar vaxtı tapılan dəmirdən hazırlanmış alətlər və başqa tapıntılar o çağın insanlarının Ərgənəkonda bəhs edildiyi kimi çətinlikdə olduqları vaxtlarda buralara gəldiyini göstərir. Bütün bunlar buranın Ərgənəkon ola biləcəyi ehtimalını gücləndirir".