"Mançester Yunayted"in "Latsio"nun yarımmüdafiəçisi Sergey Milinkoviç-Saviç üçün etməyə hazırlaşdığı təklifin dəyəri açıqlanıb.

Fanat.az xəbər verir ki, İngiltərənin "Sunday Ekspress" nəşri məlumat yayıb.

İddia olunur ki, Mançester klubu baş məşqçi Joze Mourinyonun israrla istədiyi serb futbolçu üçün "Latsio"ya 95 milyon funt-sterlinq (təxminən 217 milyon 883 min manat) təklif etməyə hazırlaşır. Roma klubu bu futbolçunu 2015-ci ildə "Genk"dən 16 milyon funt-sterlinqə (təxminən 36 milyon 697 min manat) almışdı.

22 yaşlı serb müdafiəçini "Mançester Siti" və "Yuventus"un da istədiyi bildirilir. "Mançester Yunayted" Saviçi bu qiymətə aldığı halda klub tarixinin ən bahalı transferini reallaşdırmış olacaq.