Biz hazırda ən aşağı iqtisadi artım templərindən birini yaşayırıq.

Axar.az xəbər verir ki, bunu “Qaydar forumu”nda çıxışı zamanı Rusiyanın keçmiş maliyyə naziri Aleksey Kudrin söyləyib. O, hazırkı iqtisadi artımın SSRİ-nin durğunluq dövründən də aşağı olduğunu bildirib:

“Biz aşağı templərin uzun zolağına düşmüşük. Bu təkcə neft və ya sanksiyalarla bağlı deyil. Əsas problem Rusyanın öz daxilindədir. Daha doğrusu, institusional və struktur problemləridir. Əgər ciddi islahatlar həyata keçirilsə, Rusiya 2035-ci ilə qədər öz ümumdaxili məhsulunu iki dəfə artıra bilər. Rusiya bu gün dünya sistemində öz iqtisadiyyatının payını saxlamaq istəyirsə, dünyanın ortalama iqtisadi artım templərindən yuxarı yaşamalıdır. Bu templərə çıxmaq isə elə də asan deyil. Bu hədəfin 5-7 il əvvəl qoyulmağına baxmayaraq, hələ də yerinə yetirilməyib. Yekun tədbirlər görülmür ki, yeni iqtisadi model yarada biləsən. Bizim qarşımızda çox ciddi çağırışlar var və onlar iqtisadi artıma mane olurlar. Bunlar hər şeydən öncə demoqrafik problemlər, investisiyaların çatışmazlığı, sanksiyalar, dünya maliyyə bazarlarından uzaqlaşma, texnoloji gerilik, aşağı məhsuldarlıq və dövlət idarəçiliyinin keyfiyyətidir”.