Kubanın Havana televiziya kanalında Azərbaycanın tarixi, mədəniyyəti, mətbəxi və Novruz bayramına həsr edilmiş veriliş nümayiş etdirilib.

Kult.az xəbər verir ki, veriliş zamanı Azərbaycanın zəngin təbiəti və turizm imkanları, xalqımızın adət və ənənələrindən geniş bəhs edilib.

Bildirilib ki, dünyanın ən qədim xalqlarından biri olan Azərbaycan xalqı öz mədəni sərvəti və abidələri, ədəbiyyatı, incəsənəti və musiqi irsi ilə qürur duyulası tarixə malikdir.

Veriliş zamanı Azərbaycanda qədim dövrlərdən indiyədək mövcud olan xalçaçılıq, zərgərlik, miskarlıq və sair sənətkarlıq nümunələri və tarixi memarlıq abidələrindən bəhs edilib.

Veriliş ərzində Azərbaycanda böyük sevgi ilə qeyd edilən Novruz bayramı və xalqımızın milli ənənələrindən ətraflı danışılıb. Azərbaycanda özünəməxsus fəlsəfəsi olan Novruz bayramının xalqımızın qeyri-maddi mədəni irsi kimi sülhsevərlik mədəniyyətini təbliğ edərək, bərabərlik və qardaşlıq rəmzinə çevrildiyi bildirilib.

Verilişdə qədim tarixə və mədəni irsə malik olan Azərbaycanda 1918-ci ildə Şərqdə ilk dəfə olaraq dünyəvi və demokartik dövlətin qurulduğu haqda məlumat verilib. Xalqımızın Ümummilli Lideri Heydər Əliyevin rəhbərliyi altında Azərbaycanın SSRİ tərkibində, daha sonra isə müstəqil dövlət kimi uğurlu inkişafı haqda danışılıb.

Azərbaycanın Kubadakı müvəqqəti işlər vəkili Cavanşir Salehov Havana kanalına müsahibəsində Novruz bayramının qeyd edilməsi ilə bağlı xalqımızın özünəməxsus adətlərindən bəhs edib. Diplomat müsahibə zamanı ölkələrimiz arasında ikitərəfli münasibətlərin tarixi və əldə edilmiş uğurlardan danışıb. İki ölkə arasında mədəni və siyasi əlaqələrin, habelə beynəlxalq təşkilatlar çərçivəsində əməkdaşlığın inkişaf etdiyi qeyd olunub.

Veriliş zamanı Azərbaycanın milli mətbəxinə məxsus təamların hazırlanmasına xüsusi yer ayrılıb. Azərbaycanın Kubadakı müvəqqəti işlər vəkilinin xanımı Afət Salehova veriliş ərzində ölkəmizdə Novruz bayramının xüsusi şirniyyatları və onların simvolik mənaları haqda danışıb, şəkərbura, paxlava və Azərbaycanın milli yeməklərindən biri olan dolmanın hazırlanması qaydalarını nümayiş etdirib.

Qeyd edək ki, “Odlar Yurdu Azərbaycan” layihəsi çərçivəsində fevralın 21-dən başlayaraq hər çərşənbə axşamı Kubanın televiziya və radio kanalları vasitəsi ilə Azərbaycanda Novruz bayramının adətləri haqda davamlı reportajlar yayımlanıb.