Qazaxıstanlı ekstrasens Aygül Berdigaliyeva Aktau şəhərində qəzaya uğrayan AZAL təyyarəsində həlak olmuş Zaira Atsayeva ilə bağlı paylaşım edib.

Kult.az Globalinfo.az-a istinadla xəbər verir ki, o, Z.Atsayevanın tez-tez yuxusuna girdiyini bildirib.

“Azərbaycana məxsus təyyarə qəzaya uğradıqdan sonra bir qadın tez-tez yuxuma gəlirdi. O, məndən hadisə yerinə gedib, itən zinət əşyasını tapıb, anasına çatdırmağımı istəyirdi. Qeyd edim ki, mən bu gün bunu etdim. Hadisə baş verən yerə gəldim və orada qızıl sırğanı tapdım. Özünün istədiyi kimi, sırğanı anasına vermək istəyirdim”, - ekstrasens deyib.

A.Berdigalieva digər videoda qeyd edib ki, artıq sırğa ailəsinə göndərilməsi üçün polisə təhvil verilib.

Xatırladaq ki, dekabrın 25-də Azərbaycan Hava Yolları aviaşirkətinə məxsus J2-8243 nömrəli Bakı-Qroznı reysini yerinə yetirən “Embraer 190” təyyarəsi Qroznı səmasında "Pantsir" sistemi ilə vurulub və ciddi zədələnib. Rusiya ərazisində enişinə icazə verilmədiyindən Qazaxıstana istiqamət alan təyyarə Aktau şəhəri yaxınlığında qəzaya uğrayıb. Təyyarədə 5 ekipaj üzvü və 62 sərnişin olmaqla, ümumilikdə 67 nəfər olub. Qəza nəticəsində 38 nəfər həyatını itirib, 29 nəfər sağ qalıb.