Federal hökumətin fəaliyyətinin dayandırılmasına baxmayaraq, Hərbi Nazirliyin rəsmilərinə gələn həftə hərbi qulluqçuların maaşlarını verməyi tapşırdım.

Axar.az xəbər verir ki, bunu ABŞ Prezidenti Donald Tramp deyib.

“Mən Ali Baş Komandan kimi səlahiyyətimdən istifadə edərək, hərbi nazirimiz Pit Heqseti oktyabrın 15-də qoşunlarımıza ödəniş etmək üçün bütün mövcud vəsaitlərdən istifadə etməyi tapşırıram. Biz bu məqsədlə vəsait ayırmışıq və Heqset onlardan hərbi qulluqçularımızın maaşını ödəmək üçün istifadə edəcək”, - Tramp bildirib.

“NBC Nyus”un məlumatına görə, Tramp administrasiyasının rəsmiləri və hər iki tərəfdəki qanunvericilər artıq 10 gündür davam edən şatdauna görə oktyabrın 15-də hərbçilərin maaş ala bilməyəcəyindən narahat olduqlarını bildiriblər.

“İdarəetmə və Büdcə İdarəsi Konqresə hərbi qulluqçuların maaşlarını ödəmək üçün tədqiqat və inkişaf fondlarından istifadə etmək niyyəti barədə məlumat göndərib”, - kanal bildirib.

ABŞ Prezidenti Donald Tramp da özünün “Truth Social” səhifəsində şatdaunun davam etməsinə görə demokratları ittiham edib:

“Heç bir şey edilməsə, “lider” Çak Şumer və demokratlara görə cəsur əsgərlərimiz oktyabrın 15-də haqlı olaraq alacaqları maaşı ala bilməyəcəklər”.

Qeyd edək ki, büdcə ilə bağlı Demokratlar Partiyası ilə yaranmış fikir ayrılıqları səbəbindən ABŞ-da oktyabrın 1-dən şatdaun elan edilib.