İranın Daxili İşlər naziri Əbdülrza Rəhmani Fəzli ölkədə keçirilən son prezident və Şəhər Şurası seçkilərində 1 milyon seçicinin iştirak edə bilmədiyini açıqlayıb.

Axar.az xəbər verir ki, nazir seçki günündə səsvermə müddəti bir neçə dəfə uzadılsa da, öz səsini sandıqlara salmaq üçün saatlarla növbədə duran xeyli insanın səsvermədə iştirak edə bilmədiyini deyib.

“Ötən cümə günü səsvermə məntəqələri saat 00:00-a qədər fəaliyyət göstərdi. Bu isə səsvermənin son qanuni vaxtı kimi nəzərdə tutulmuşdu. Lakin buna baxmayaraq, səs vermək üçün saatlarla növbədə duran təxminən 1 milyon nəfər qanuni vaxt başa çatdığına görə səsverməyə qatıla və öz səsini sandığa sala bilməyib. Yayılan bəzi məlumatlarda isə belə bir iddia irəli sürülür ki, səsverməyə qatıla bilməyən vətəndaşların sayı guya 3-4 milyon nəfərdir. Lakin bizim təxminimizə görə, bu rəqəm 1 milyon nəfərdir və hesab edirik ki, bu rəqəm daha real görünür”.

Xatırladaq ki, mayın 19-da İranda 12-ci prezident seçkisi keçirilib. Seçkilərdə dörd namizəd - Həsən Ruhani, İbrahim Rəisi, Mustafa Mirsəlim və Mustafa Haşimi Təba rəqabət aparıb. Həsən Ruhani səslərin 57 faizini qazanaraq, ikinci dəfə prezident seçilib.