İsrailin on il əvvəl Suriyada nüvə reaktorunu bombalaması ilə bağlı yaydığı xəbər yalandır. Onlar bu yolla İranı qorxutmağa çalışırlar.

Axar.az xəbər verir ki, bu sözləri Sputnik-ə açıqlamasında Dəməşq Strateji Araşdırma Mərkəzinin rəhbəri, suriyalı politoloq Tələb İbrahim deyib. O bildirib ki, İsrailin göstərdiyi bölgədə nüvə stansiyası yoxdur:

“Suriyanın belə bir əraziyə sahib olmadığı məlumdur. Bizim nüvə proqramımız yoxdur. Nüvə stansiyasına hücum adı ilə Suriya ordusuna aid hərbi bazanı vurmuşdular. Buna görə bu məlumatı gizləyirdilər. Onlar bu yolla İrana nüvə stansiyalarını vura biləcəklərini və İsrail təyyarələrinin bölgədəki hər yerə girmək imkanını göstərirlər. Mənə elə gəlir ki, bunlar İrana verilən siqnal və xəbərdarlıqdan başqa bir şey deyil. 1982-ci ildə İsrail İraqın nüvə reaktoruna hücum adı altında Suriyaya aid binaya hücum edərkən, İran məsələni başa düşmüşdü. İndi İranın nüvə stansyaları İsrailin əlinin çata bilmədiyi yerdədir”.

Qeyd edək ki, ötən gün İsrail on il əvvəl Suriyada nüvə reaktorunu bombaladığını bəyan edib.