"Əgər Federal Ehtiyat Sistemi (FES) gələn ilin ilk yarısında uçot dərəcəsini artıracaqsa, deməli, dollar bahalaşacaq (digər valyutalara nisbətən), ucuz kreditlərə çıxış məhdudlaşacaq, bu isə öz növbəsində əmtəələrin (neft, qaz, qızıl, qiymətli metallar) qiymətinin ucuzlaşmasına gətirib çıxaracaq".

Axar.az xəbər verir ki, bu açıqlama ilə iqtisadçı-ekspert Natiq Cəfərli çıxış edib. Onun sözlərinə görə, ABŞ bu gün dünyanın taleyini həll edəcək qərar verəcək:

"Bu gün ABŞ-ın Federal Ehtiyat Sistemi (FES) sədri Canet Yellen bu il üçün son iclasın qərarlarını açıqlayacaq. Bütün dünya indi o xanımın hansı sözləri deyəcəyini gözləyir. Çox güman ki, xanım Yellen ABŞ iqtisadiyyatının daha da dayanıqlı olması, işsizliyin azalması, ÜDM-in artması haqqında mesajlar verəcək. Böyük ehtimal ki, FES-in faiz dərəcəsinin artırılması haqqında gələn il addımlar atılacağına işarə edəcək. Əgər FES gələn ilin ilk yarısında uçot dərəcəsini artıracaqsa, deməli, dollar bahalaşacaq (digər valyutalara nisbətən), ucuz kreditlərə çıxış məhdudlaşacaq, bu isə öz növbəsində əmtəələrin (neft, qaz, qızıl, qiymətli metallar) qiymətinin ucuzlaşmasına gətirib çıxaracaq. FES-in qərarından sonra, çox güman ki, Britaniya, Avstraliya, Kanada, Yaponiya mərkəzi bankları da uçot dərəcəsini addım-addım artıracaq. Bu da öz növbəsində ucuz kreditlərin dövrünü bitirəcək, yəni birjalarda "balonların" şişməsinin qarşısını alacaq. Deməli, Yellen xanımın dedikləri bütün dünyaya təsir göstərəcək, çünki sözünün arxasında ABŞ-ın iqtisadi gücü dayanır. Rusiyanın yetkililəri deyir ki, rubl güclənəcək, dəstəklənəcək. Rusiyanın Mərkəzi Bankı bir gecədə uçot dərəcəsini 6,5 faiz artırır, amma heç kim inanmır, çünki bu sözlərin arxasında iqtisadi, texnoloji güc yoxdur. Məsələ əslində, bu qədər sadədir".