Ukrayna Prezidenti Pyotr Poroşenko Rusiya ilə konfliktin hərbi yolla həlli imkanlarını görmür və sentyabrda imzalanmış Minsk razılaşmasının yerinə yetiriləcəyinə ümid edir.

Axar.az xəbər verir ki, Poroşenko bu barədə Varşavada Polşa telekanalına verdiyi müsahibəsində deyib.

"Biz terrorçuları zərərsizləşdirmək üçün yeni ordu yaratmışıq, amma bu konflikti hərbi yolla həll etməyəcəyik. Rusiyanın milyonlarla əsgəri var, dünyanın ən böyük və ən güclü ordusuna sahibdir. Biz ona müqavimət göstərə bilmərik", - Poroşenko deyib.

Ukrayna prezidenti konfliktin həlli üçün danışıqların davam etdirilməsini vacib sayıb:

"Hər kəs danışıqlar masası arxasına oturmalıdır. Rusiya öz növbəsində Minsk planını yerinə yetirməlidir. Ukrayna üzərinə götürdüyü öhdəliyə əməl edir. Amma Rusiya bunu etmir, ancaq boş sözlərlə məşğuldur və bunun da nəticəsi 5 min ukraynalının həlak olmasıdır".