Yunanıstanın II Dünya Müharibəsi vaxtı Nasist işğalına görə Almaniyadan təzminat tələb etməsinə Almaniyadan cavab gəlib.

Axar.az xəbər verir ki, Almaniyanın Baş Nazir köməkçisi və İqtisadiyyat naziri Siqmar Qabriel Yunanıstanın bu mövzu ilə bağlı müzakirələrinin mənasız olduğunu bildirib.

Yunanıstanın borcları ilə hərbi təzminat tələbinin bir-birindən fərqli mövzu olduğunu qeyd edən nazir belə deyib: "Bu, Yunanıstanın vəziyyətini bir millimetr də irəlilətməz. Mən bunu axmaq hərəkət hesab edirəm".

Açıqlama verən nazir Almaniya üçün təzminat mövzusunun həm hüquqi, həm də siyasi baxımdan bağlanmış olduğunu vurğulayıb.

Xatırladaq ki, bir müddət əvvəl Yunanıstanın Maliyyə nazirinin köməkçisi Dmitris Mardas Parlamentdə çıxış edərək Yunanıstanın Almaniyadan istədiyi hərbi təzminatın 278.7 milyard avro olduğunu açıqlamışdı.