Şimali Koreya lideri Kim Çen İn ölkədə ərzaq böhranının olduğunu etiraf edib və xalqı ağır günlərə hazırlaşmağa çağırıb.

Axar.az xəbər verir ki, bu barədə BBC məlumat yayıb.

Məlumata görə, Şimali Koreya lideri ölkədəki vəziyyəti 90-cı illərdə bir neçə milyon insanın ölümünə səbəb olan aclıqla müqayisə edib.

“Hazırda koronavirus səbəbindən Çindən ölkəyə ərzaq gətirilməsi demək olar ki, dayandırılıb. Ötən il isə Şimali Koreya iki qasırğadan əziyyət çəkdi. Kəskin hava şəraiti böyük ölçüdə əkin sahələrini məhv etdi ki, bu da ölkədə ərzaq qıtlığının yaranmasına səbəb oldu. Şimali Koreyanın kənd əhalisinin əsas qida mənbəyi olan qarğıdalının kilosunun qiyməti aylıq maaşdan çoxdur. Artıq ölkədə aclıqdan ölüm xəbərləri gəlir, uşaqlar, qocalar küçələrdə dilənçilik edir”, - BBC yazıb.

Kanal qeyd edir ki, fəlakətli vəziyyətə baxmayaraq, Pxenyan yardım təklifindən imtina edib.