Ankarada terror aktını törədənlərdən Ömər Dəniz Dündarın əkiz qardaşı Mahmud Qazi Dündar Suriyada YPG-yə (peşmərgə) əsir düşüb.

Axar.az xəbər verir ki, bu barədə "Doğan Xəbər Agentliyi" məlumat yayıb.

Məlumata görə, Mahmud Qazi 2013-cü ildə qardaşı ilə birlikdə Suriyaya gedərək İŞİD-ə qoşulub. O, bir müddət Suriyanın Türkiyə sərhəddində yerləşən Tel-Abyad şəhərində təlimlər alıb.

Bu ilin iyununda şəhəri ələ keçirən YPG Mahmud Qazini əsir götürüb. Onun həyat yoldaşı isə İŞİD-in paytaxtı Rakkaya qaça bilib. YPG rəsmiləri Mahmud Qazi Dündarın hələ də Tel-Abyad həbsxanasında olduğunu təsdiqləyiblər.

Qeyd edək ki, oktyabrın 10-da Ankarada terror aktı törədilib. İki partlayış zamanı 97 nəfər həlak olub. Kamikadzelərin Yunus Əmrə Alagöz və Ömər Dəniz Dündar olduğu müəyyənləşib.