Meksika ABŞ-ın rüsumlar tətbiq etməsinə tarif və qeyri-tarif tədbirləri ilə cavab verəcək, lakin dialoqa açıq qalır və Donald Trampa vəziyyəti həll etmək üçün işçi qrupu yaratmağı təklif edir.

Axar.az xəbər verir ki, bunu Meksika Prezidenti Klaudiya Şeynbaum deyib.

“İqtisadiyyat nazirinə Meksikanın maraqlarını qorumaq üçün tarif və qeyri-tarif tədbirlərini özündə əks etdirən B planını həyata keçirməyi tapşırıram. Biz Ağ Evin ərazimizə hər hansı müdaxiləsini və cinayət təşkilatları ilə əlaqədə ittiham olunan Meksika hökumətinə qarşı böhtanı qəti şəkildə rədd edirik. Meksika fentanilin (narkotik maddə - red.) nəinki ABŞ-a, ümumiyyətlə heç bir yerə getməsini istəmir. Əgər ABŞ narkotik alveri edən və zorakılıq yaradan cinayətkar dəstələrlə mübarizə aparmaq istəyirsə, biz birlikdə işləməliyik”, - Şeynbaum bildirib.