Nə xarici, nə də yerli investorlar Ermənistana investisiya qoymaq istəyir.

Axar.az xəbər verir ki, bu sözləri öz Feysbuk səhifəsində deputat Rasim Musabəyov paylaşıb.

“Ermənistan Baş naziri Karen Karapetyan Davos Forumunda biznesmenləri cəsarətlə öz ölkəsinə investisiya yatırmağa çağırdı. O, buna əsas dəlil kimi Ermənistan iqtisadiyyatının yaxşı vəziyyətdə olmasını göstərdi. 2017-ci ilin nəticələrinə əsasən, bu ölkədə ümumdaxili məhsul 7%, sənaye istehsalının həcmi 12%, xidmətlər 14%, ixracat 23,5% və idxalat 28% artıb. Lakin rəsmi statistika artımın mis və molibden üçün əlverişli qiymə konyukturası, eləcə də dövlət borcunun artırılması nəticəsində olduğu barədə susur. Yüksək səsli çağırışların əksinə olaraq, diaspor da daxil olmaqla, nə investorlar, nə də yerli investorlar Ermənistana investisiya qoymaq istəyir. Kağız üzərində Ermənistan iqtisadiyyatı yüksəlişdədir, amma bununla belə qəribə şəkildə ölkənin bazarı daralır, əhalinin gəlirləri azalır, daxili ticarət dövriyyəsi pulla yanaşı fiziki baxımdan da məhdudlaşır, dövlət borcu 15% artır. Bu ölkənin əhalisi ümidsiz yoxsulluqla yüklənir və xilas yolunu ölkədən kütləvi qaçışda görürlər. İkimənalı erməni iqtisadi statistikası bax belə olur”, – deyə o bildirib.