Bakı Ali Neft Məktəbində "Halliburton" şirkətinin mütəxəssisləri SOCAR əməkdaşlarına seminar keçib.

Dövlət neft Şirkətindən Axar.az-a verilən məlumata görə, "Halliburton" şirkəti tərəfindən SOCAR-ın mütəxəssisləri üçün quyuların tamamlanması ilə bağlı seminar keçirilib. Seminarda "Azneft" İstehsalat Birliyinin, Kompleks Qazma İşləri Trestinin, "SOCAR-AQŞ" MMC-nin, ''SOCAR ÜMİD'' MMC-nin və digər struktur qurumlarının mühəndisləri iştirak edib.

Seminarın əsas məqsədi iki şirkət arasında qarşılıqlı əməkdaşlığı təmin etməkdir. Həmçinin, "Halliburton" şirkəti tərəfindən quyuların tamamlanmasında ən müasir və yüksək keyfiyyətli xidmət və avadanlıqlar təklif etməkdir.

İki gün ərzində seminar iştirakçılarına "Təhlükəsizlik məsələləri barədə məlumat", ""Halliburton" şirkətinin quyuların tamamlanması vasitələrinin işinin təşkili və ümumi imkanları", "Sağlamlıq, təhlükəsizlik və ətraf mühitin mühafizəsinin neft sənayesində vacibliyi", "Qlobal mühitdə istifadə olunan müxtəlif tamamlama layihələri", "Tamamlamada axının idarə olunması", ""Halliburton" şirkətinin məhsul xidmətləri şəbəkəsi və Xəzər regionunda imkanları", "Qumla mübarizə metodları və süzgəclər" və digər mövzularda təqdimatlar keçirilib.