Bir qrup əlilliyi olan şəxs Türkiyənin Dənizli bölgəsinə bərpa müalicəsinə yola salınıb.

Əmək və Əhalinin Sosial Müdafiəsi Nazirliyindən Axar.az-a verilən məlumata görə, nazirlik tərəfindən 29 nəfərdən ibarət bir qrup əlilliyi olan şəxs Beynəlxalq Hava Limanından Türkiyə Respublikasına bərpa müalicəsinə göndərilib.

Bu ayın əvvəlində 28 nəfər əlilliyi olan şəxs Türkiyənin Dənizli bölgəsində yerləşən Nobel Tibb Mərkəzinə yola salınıb. Onlara mərkəzdə yüksək səviyyədə bərpa-müalicə xidməti göstərilib ki, bu da onların səhhətində müəyyən yaxşılaşmaya səbəb olub. Son bir ayda Nobel Tibb Mərkəzində bərpa-müalicə kursuna göndərilən əlilliyi olan şəxslərin sayı artıq 57 nəfərdir.

Qeyd edək ki, Türkiyənin Dənizli bölgəsi müalicəvi təbii potensialı, o cümlədən müalicəvi palçıq sahələri, mineral bulaqları, şəfalı havası və suyu ilə tanınan sanator-kurort məkanıdır. Nobel Tibb Mərkəzində də bu bölgənin müalicəvi resurslarından istifadə olunmaqla səmərəli fizioterapevtik müalicə metodları (hidroterapiya, palçıq müalicəsi, tibbi masaj, sudaxili məşqlər, mexanoterapiya, hidroprosessor və s.) tətbiq olunur. Yola salınan əlilliyi olan şəxslər mərkəzdəki 5 ulduzlu oteldə yerləşdiriləcək və peşəkar həkim-reabilitoloq personalı tərəfindən onlara lazımi reabilitasiya xidmətləri göstəriləcək. Orada əlilliyi olan şəxslərin bərpa müalicəsinə nəzarət etmək, eləcə də mərkəzin reabilitasiya təcrübəsinin öyrənilməsi üçün ƏƏSMN-in bir nəfər həkimi də Türkiyəyə ezam edilib.