Türkiyənin İzmir şəhərində Bakının işğaldan azad edilməsinin 108-ci ildönümü qeyd olunub.

Axar.az xəbər verir ki, bu barədə Türkiyə mediası məlumat yayıb.

Azərbaycan Türkləri ilə Dostluq Dərnəkləri Federasiyası və İzmir Azərbaycan Dərnəyinin təşkilatçılığı ilə baş tutan tədbirdə çoxsaylı qonaqlar, gənclər və azərbaycansevərlər iştirak ediblər.

Tədbirin açılışını Azərbaycan Türkləri ilə Dostluq Dərnəkləri Federasiyasının sədri İsa Ambarcı edib.

Türkiyə-Azərbaycan Parlamentlərarası Dostluq Qrupunun sədri və tədbirin əsas çıxışçılarından biri olan Şamil Ayrım Türkiyə ilə Azərbaycan arasındakı tarixi qardaşlıq əlaqələrinə diqqət çəkib. Ayrım Bakının azad edilməsindən Qarabağ Zəfərinə qədər uzanan tarixi prosesdə iki qardaş xalq arasındakı həmrəylikdən bəhs edib və Azərbaycanın işğaldan azad etdiyi ərazilərdə həyata keçirilən bərpa və yenidənqurma işlərini dəyərləndirib.

Tədbirdə Taner Gür Nuru Paşanın komandanlığı altındakı Qafqaz İslam Ordusu və Azərbaycan qüvvələrinin Bakıya daxil olması ilə şəhərin işğaldan azad edildiyini xatırladıb.

Tədbirin aparıcısı aktrisa və mədəniyyət səfiri Roza İbadova Kocamaz olub.