Respublika ərazisində qanunsuz balıq ovu ilə bağlı irimiqyaslı reydlərə start verilib.

Ekologiya və Təbii Sərvətlər Nazirliyindən Axar.az-a verilən məlumata görə, Xəzər dənizinin bioresurslarında balıq ehtiyatlarının qanunsuz ovlanması və satışının qarşısı heç də tam alınmayıb. Bu istiqamətdə işlər aparılsa da, belə anoloji hallara yol verildiyi barədə nazirliyə şikayətlər daxil olmaqdadır.

Bu məqsədlə nazirlik Xüsusi Komissiya yaradıb və Komissiyanın tərkibinə nazirliyin müvafiq qurumlarının əməkdaşları ilə birgə ictimaiyyət nümayəndələrinin, o cümlədən QHT təmsilçilərinin və həvəskar balıq ovçularının qatılması barədə qərar qəbul olunub.

Nazirlik müvafiq normalar çərçivəsində balıq ovu ilə məşğul olan şəxsləri yaradılmış Komissiyanın işində aparılacaq yoxlamalarda iştirak etməyə dəvət edir.

Nazirlik könüllülərdən 168 saylı qaynar xəttə, həmçinin Ətraf Mühitin Mühafizəsi Departamentinə (012-537-21-86, 012-537-21-67) müraciət etmələrini xahiş edir.