Rusiya Prezidenti Vladimir Putin dünyada qadağan olunmuş vahiməli fosfor silahlarını ukraynalı separatçılara verməyə hazırlaşır.

Axar.az Ukrayna mediasına istinadən xəbər verir ki, bu barədə Feysbuk səhifəsində Ukrayna Daxili İşlər nazirinin müavini Anton Geraşenko məlumat yerləşdirib. O bildirib ki, bir müddət öncə terrorçulara yaxın mediada Ukrayna ordusunun guya ağ fosfor silahından istifadə etdiyi barədə məlumatlar dolaşıb:

"Təbii ki, bu cəfəngiyyatdır. Əslində, Rusiya terrorçulara bu silahı verməyə hazırlaşır. Hələ də bu ölkənin silah ehtiyatında yetərincə bu silahlardan mövcuddur. Xüsusiyyətlərinə gəlincə, bu silah geniş radiusu əhatə etməklə 800 dərəcə istilik yarada bilir ki, bu da insanların ağır və vahiməli şəkildə ölümünə səbəb olur. SSRİ, indiki halda isə onun varisi Rusiya 1983-cü ildən sözügedən silahların qadağasını nəzərdə tutan konvensiyaya qoşulsa da, sənədə bu günə qədər əməl etmir".

Geraşenko diqqətə çatdırıb ki, Ukrayna Daxili İşər Nazirliyində separatçıların bu silahdan əldə etmələri üçün Rusiya ilə danışıqlar apardığı barədə dəqiq məlumat mövcuddur. Separatçılar ağ fosfordan "Qrad" qurğuları vasitəsilə istifadə etməyi planlaşdırır.