Avropa Birliyi Rusiyaya qarşı tətbiq etdiyi yeni sanksiyalarla bağlı məlumat yayıb.

Axar.az-ın "Qazeta.ru"ya istinadən xəbərinə görə, yeni siyahıya Rusiya Prezident Administrasiyası rəhbərinin müavini Aleksey Qromov və Prezident Vladimir Putinin ən yaxın dostlarından biri, "SMP" bankının Direktorlar Şurasının sədri Arkadi Rotenberqin adları salınıb.

Qeyd edək ki, siyahıya Rusiya prezidentinin başqa bir dostu, "Piter klanı"nın ən fəal üzvlərindən olan biznesmen Yuri Kovalçuk, Konstantin Malofeyev və birincinin rəhbəri olduğu "Rossiya" bankının ən böyük səhmdarı olan Şmarov daxil edilib. Bundan başqa, Avropa Birliyinin tətbiq etdiyi yeni siyahıya "Almaz Antey", "Dobrolyot" aviasiya şirkəti kimi nəhəng konsernlər əlavə edilib. Adı çəkilən sonuncu şirkət Krıma uçuşlar etdiyinə görə köhnə qitənin hədəfinə düşüb.

Məlumatda Krım və Sevastopolda nəqliyyat, telekommunikasiya, energetika, eləcə də neft, qaz, mineral ehtiyatlar sahəsində yeni investisiyaların qoyulmasına qarşı məhdudlaşdırıcı tədbirlərin qəbul olunduğu da qeyd edilib.

Ümumilikdə isə Ukrayna hadisələrinə görə "qara siyahı"ya 95 nəfər və 23 hüquqi şəxs daxildir.