Ana səhifə Planet |
"Avrasiya İqtisadi Birliyi səmərəli olmayan bir ittifaqdır. Müəyyən güzəştlərin olmasına baxmayaraq, bu birliyin heç bir perspektivi yoxdur".
Bunu Axar.az-a açıqlamasında iqtisadçı-ekspert Samir Əliyev Belarus prezidentinin Avrasiya İqtisadi Birliyindən çıxa bilməsi xəbərdarlığına münasibət bildirərkən deyib.
Onun sözlərinə görə, Belarus bu birlikdən çıxarsa bu onun fəaliyyətinə mənfi təsir göstərə bilər:
"Əgər Belarus bu birlikdən çıxsa, onsuz da işləməyən bir qurumun gələcəyini daha da sual altına qoymuş olacaq. Digər ölkələrin də bu birlikdə iştirakının elə bir əhəmiyyəti olmayacaq".
İqtisadçı bildirib ki, bu birlik iqtisadi maraqlardan daha çox siyasi maraqlara hesablanmış bir qurumdur:
"Bu, əsasən, Rusiyanın güzəştləri üzərində qurulmuş bir birlikdir. Sərhəddən keçəndə xarici pasportun tələb olunmaması və bir sıra gömrük güzəştləri ilə Rusiya bundan siyasi maraqları üçün istifadə edir".
S.Əliyev qeyd edib ki, Azərbaycanın bu quruma qoşulması üçün dəfələrlə təklif gəlsə də, ölkəmizin marağında olmadığı üçün qoşulmaqdan imtina edib:
"Azərbaycanın indiki yürütdüyü siyasəti nəzərə alsaq, bu quruma qoşulmasının xeyrindən çox zərəri var. Əgər Azərbaycan Avropaya inteqrasiyanı özü üçün prioritet seçibsə və bu birlikdə perspektiv görmürsə, qoşulmağın mənası da yoxdur".
Qeyd edək ki, Minskdə keçirdiyi mətbuat konfransında çıxışı zamanı Belarus Prezidenti Aliksandr Lukaşenko xəbərdarlıq edib ki, əgər tərəfdaşlar öhdəliklərinə əməl etməsələr, onun ölkəsi Rusiya, Qazaxıstan və Ermənistanın daxil olduğu birlikdən çıxa bilər.
Tarix
2015.01.31 / 09:10
|
Müəllif
Təranə Səfərova
|