İngilis taxtının ikinci varisi Kembric şahzadəsi Uilyamla 4 il əvvəl ailə quran və ikinci övladını dünyaya gətirən Kembric hersoqinyası Keyt Midltonun qızının adı mediaya açıqlanıb.

Axar.az ingilis Teleqraf-a istinadən xəbər verir ki, Kensinqton sarayından verilən məlumata görə, şənbə günü paytaxt Londonun Sant Meri xəstəxanasında dünyaya gələn bütün dünyanın böyük maraqla gözlədiyi körpəyə Şarlotta Elizabet Diana adı verilib.

Körpənin adının nə olacağı ilə bağlı bir müddətdir ki, dünya mediası üzərindən sorğu aparılırdı. Taxt sıralamasında babası şahzadə Çarlz, atası şahzadə Uilyam və böyük qardaşı Corcdan sonra dördüncü olan şahzadənin adının Alis, Şarlotta və ya Diana olacağı təxmin edilirdi. Şarlotta Elizabet Diana adı seçilməklə uşağa həm kraliça Elizabetin, həm də 1997-ci ildə Parisdə yol qəzasında həlak olan Uels şahzadəsi Diananın adı verilmiş olub.

Qeyd edək ki, Kembric şahzadəsi Uilyamla Kembric hersoqinyası Keytin ilk övladı şahzadə Corc 2013-cü ildə anadan olub.