Bəziləri Fəxri Xiyabanda tələbələrə dərs keçməyimin Avropa standartları olduğunu vurğuladılar. Bu fikirlə razı deyiləm.

Kult.az xəbər verir ki, bu sözləri millət vəkili, professor Aydın Mirzəzadə dünən Qərbi Kaspi Universitetinin tələbələrinə Fəxri Xiyabanda dərs keçməsi ilə bağlı paylaşımına reaksiyaları dəyərləndirərkən qeyd edib. O, Azərbaycanın tədris üsullarının heç də başqa ölkələrdən geri qalmadğını bildirib:

“Biz heç kəsdən nə yenilikdə, nə qabiliyyətdə əskik deyilik. Texnika və texnologiyaları inkişaf etmiş dövlətlərdən alsaq da, fəaliyyət və davranış normaları özümüzün min illələrlə yaratdığımız dəyərlərdir. Nə ediriksə, öz genetik bacarığımızdan və hazırlığımızdan irəli gəlir. Bu gün tək təhsildə deyil, həyatımızın bütün sahələrində kifayət qədər maraqlı və cəsarətli addımlar atırıq və bunların müsbət nəticələrini də daima hiss edirik.

Əgər 1920-ci ildə müstəqilliyimiz itirilməsəydi, indi dünyanın ən aparıcı ölkələrindən biri olardıq, heç indi də geridə deyilik. Müstəqilliyimizin bərpa edildiyi 27 il ərzində böyük irəliləyişlərimiz var və hər bir vətəndaşımız da ölkəmizin inkişafına öz töhvəsini verir”.

Qeyd edək ki, A.Mirzəzadə ötən gün Qərbi Kaspi Universitetinin politologiya fakültəsinin 4-cü kurs tələbələrinə dərsini Fəxri Xiyabanda keçib. Onun bu addımı sosial şəbəkələrdə maraqla qarşılanıb.