Oktyabrın 26-da Tovuz rayonunda yerləşən N saylı hərbi hissənin əsgəri Cəmil Elxan oğlu Hüseynzadənin tabeçiliyində olduğu zabit və 5 əsgər tərəfindən ölümcül döyülərək kanala atılması barədə valideynlərinin mətbuata açıqlamasına münasibət öyrənmək üçün Qazax Hərbi Prokurorluğuna müraciət etdik.

"Axar.az"ın müraciətinə cavab olaraq Hərbi Prokurorluqdan bildirildi ki, hadisə ilə bağlı cinayət işi başlanılıb və işi müstəntiq Xəyal Rüstəmov aparır.

"İş obyektiv aparılacaq"

Müstəntiq Xəyal Rüstəmov hadisəylə bağlı geniş məlumat verməkdən imtina etdi: "İşin istintaqı gedir, ona görə də ətraflı məlumat verə bilmərəm".

Qeyd edək ki, əsgərin öz-özünü güllələməsi barədə qeyri-rəsmi məlumatlara Cəmil Hüseynzadənin valideynləri işi ört-basdır etmək kimi reaksiya verirlər. Onların sözlərinə görə, istintaqı yanlış səmtə yönləndirmək və məsuliyyətdən qurtarmaq üçün belə izahatlar təqdim edilir və şayiələr yayılır.

Bu barədə sorğumuza müstəntiq Xəyal Rüstəmov, "Əmin ola bilərsiniz ki, işə obyektiv baxılacaq", - deyə cavab verdi.