ABŞ-ın "Maykrosoft" korporasiyası "HoloLens" əlavə reallıq eynəyini təqdim edib.

Axar.az xəbər verir ki, bu barədə korporasiyanın təqdimatında "Kinect" oyun tərtibatçılarından biri Aleks Kipmen məlumat verib.

Xarici görünüşünə görə dağ xizək idmanı üçün nəzərdə tutulmuş eynəyi xatırladan "Hololens" qurğusunun şüşəsi yarımşəffaf ekrandır və ətraf mühit obyektlərini rəqəmli qrafika ilə çəkir. Eynəkdə "Vindovs 10" əməliyyat sisteminə inteqrasiya olunan yeni "Maykrosoft Holoqrafik" (Microsoft Holographic) virtual reallıq texnologiyası quraşdırılıb.

"Maykrosoft" nümayəndələrinin sözlərinə görə, "Hololens" müxtəlif kontekstlərdə - istifadəçidən (oyunlar, Skayp, videoya baxmaq) tutmuş, peşəkar (HoloStudio əlavəsi ilə 3D layihələndirmə, birgə iş) kontekstlərədək istifadə etmək mümkündür.

Eynək tam avtonom işləyir, smartfona və ya planşet kompüterə qoşulmanı tələb etmir. Quraşdırılmış kamera və sensorlar istifadəçinin başının vəziyyətini izləməyə və virtual obyektlərlə əlaqəni simulyasiya etməyə imkan verir. Qurğu həmçinin prosessor və qrafika emalı modulu ilə təchiz edilib.

Qeyd edək ki, qurğunun qiyməti və bazara çıxarılma müddəti barədə məlumat verilməyib.