Sürücülərin bəzək məqsədi və texniki dəyişikliklər üçün etdikləri tüninq nəqliyyat təhlükəsizliyini aşağı salaraq qəza riskini artırır.

Axar.az xəbər verir ki, bu sözləri Türkiyə Nəqliyyata Nəzarətetmə Şöbəsinin müdiri İsmayıl Erol deyib.

Onun sözlərinə görə, avtomobillərə vurulan tündləşdirilmiş şüşələr sürücünün görüntü bucağını iki dəfə azaldır. Hava qaralanda isə bu şüşələrlə avtomobil idarə edən şəxslər ətrafda baş verənləri tamamilə görmür. Bu isə birbaşa qəzalara və ölümlərə yol açır. Qəza zamanı tündləşdirmə vasitələri vurulan şüşələrin rahat şəkildə sınmadığı üçün sürücünün avtomobildən çıxmaq imkanı da qalmır.

İsmayıl Erolun sözlərinə görə, texniki hissələrdə aparılan tüninq işləri də sürücüləri hər an təhlükə ilə üzbəüz qoya bilər:

"Avtomobillərin texniki hissəsində aparılan dəyişikliklər zavod parametrlərinin işləmə mexanizmini sıradan çıxarır. Qəzalara ən böyük yol açan səbəb isə avtomobillərin arxa yaylarının kəsilməsidir ki, bunlar əyləc sisteminə mənfi yöndə ciddi təsir edir".