Meksikalı futbolçu Erik Marin inanılmaz yalan danışıb.

Axar.az xəbər verir ki, latın amerikalı idmançı "Neftçi"də çıxış etdiyini açıqlayıb.

O, özünü xoşbəxt hiss etdiyini deyib: "Çünki Azərbaycanda çıxış etmişəm, ölkə xaricində çempion olmuşam".

Futbolçu 2010-cu ildə karyerasını "Kruz Azul"un heyətində başa vurub. Marin hətta Bakı təəssüratlarını da bölüşüb: "Peru klubu "Koronel Bolonesi" ilə çempion olmuşam. Mən həm də Azərbaycan təmsilçisi "Neftçi"də çıxış etmişəm.

Bu komanda yerləşdiyi Bakının simvollarından biridir. Yaxşı təcrübə idi. Ümumiyyətlə, meksikalılar dünyanın istənilən yerində oynaya bilirlər. Amma ailədən uzaq yaşamaq, bilmədiyin dilə uyğunlaşmaq çətindir".

APA-nın məlumatına görə, tam adı Erik Alexandro Marin Martines olan sabiq oyunçu "Neftçi"dəki karyerasından bəh-bəhlə danışsa da, bu insanın Azərbaycan futbolu ilə yaxından-uzaqdan əlaqəsi olmayıb.

Məlum olub ki, müstəqillik dövründə ölkəmizdə cəmi 1 meksikalı futbolçu çıxış edib. O da 2007/08 mövsümündə "Standard" klubunda çıxış etmiş Osvaldo Lukadır. Yəni Erik Marin xaricdə oynadığını nümunə göstərmək üçün yalan danışıb.